• Sinopse
• Autor e director
• Reparto
• Prensa
• Ficha técnica
• Multimedia

Xornalista de formación, Comba Campoy chega ao mundo da interpretación en 2000, coa súa participación na serie de televisión “Rías Baixas”. A súa experiencia teatral iníciase en 2003, cando protagoniza, xunto a Pepe Penabade, o espectáculo Salitre. Un ano máis tarde estrea, coa mesma compañía e xunto ao mesmo actor, Jalisia, mimadriña!. A partir de 2004 participa, tamén xunto a Penabade, nun espectáculo de teatro de rúa, Pecata Minuta. Paralelamente á súa actividade teatral, a actriz intervén en varias producións cinematográficas, como Días de voda (2001), de Juan Pinzás, ou Por min e por tódolos meus compañeiros (2005), de Judas Diz.



Formouse como actriz no grupo de teatro universitario Eis Teatro durante cinco anos (1999- 2004), onde chegou a dirixir tres dos espectáculos do grupo. Tamén destaca a súa participación na Aula de Teatro da Universidade de Santiago de Compostela baixo a dirección de Roberto Salgueiro, intervindo nos espectáculos Ubú Encadeado de Alfred Jarry, e O velorio de Pat O’Connor de Roberto Salgueiro. Como actriz profesional, participou nos espectáculos Os Carros do Camiño, de Ollomol Tranvía e GPD (1999); O retrato de Dorian Gray, de Oscar Wilde, dirixida por Vicente Montoto en 2001; Cousas de Castelao, adaptada e dirixida por Jorge Rey (2003) e Os piratas, espectáculo de rúa dirixido tamén por Jorge Rey, 2004.



Xosé Luís Rivas Cruz e Baldomero Iglesias Dobarrio, máis coñecidos como Mini e Mero, son os encargados de pór banda sonora a PAN. Mini e Mero, históricos representantes da canción galega, teimudos recuperadores do noso patrimonio inmaterial, serán os encargados de pórlle a banda sonora ao espectáculo en directo. Xosé Luís Rivas Cruz e Baldomero Iglesias Dobarrio foron membros ata o ano 82 do grupo musical Fuxan os Ventos, actualmente de A Quenlla. Participaron na gravación de máis de 14 discos de longa duración, son autores de máis dun cento de cancións e dos libros Contos de Vellos para Nenos, Somos Lenda Viva, Cantares de Cego (volumes I e II), como principio do traballo de divulgación do arquivo de folclore galego que entrambos recompilaron ao longo destes 33 anos. Nos últimos vinte anos dan numerosas charlas cantadas divulgativas sobre a Música Tradicional Galega, a súa aplicación á escola, a música do Nadal... Actualmente están en proceso de dixitalización do seu arquivo de folclore en colaboración co Museo do Pobo Galego para cedelo a esta institución e que así pase a consulta e goce do público en xeral na teima de devolver a recolla ao país que é a quen pertence.




O seu contacto co mundo teatral iníciase en 1987, coa súa participación en distintos espectáculos como actor e escenógrafo, nomeadamente coa compañía “Os Quinquilláns”, coa que participa en numerosos espectáculos. No ano 2000 funda a compañía “Volta e Dálle”, cuxo primeiro espectáculo, Furga Garabela! (2002), un monólogo interpretado por el. Deste espectáculo xorde unha versión para rúa que co nome de Rodesindo da Barrosa continúa a percorrer numerosas feiras medievais e outros eventos similares por toda a xeografía galega e parte da estranxeira. Despois virán Salitre (2003) e Jalisia, mimadriña! (2004), onde comparte cartel con Comba Campoy. Ese mesmo ano estrea Pecata Minuta, espectáculo de rúa para feiras medievais. Ten participado ademais en espectáculos doutras compañías, como Pallasos (2004) de Uvegá Teatro.



Nado en 1983, este xoven actor iniciouse na interpretación a través dos grupos de teatro amador “Ullán” (desde 1999) e “Andaravía” (desde 2002), de Vedra, participando como actor e técnico en numerosas obras. Ao mesmo tempo, inicia a súa formación con mestres como Pepe Penabade, Delfina Miguélez, Artur Trillo ou Xoan Curiel. Ten actuado como contacontos en distintos locais da xeografía galega, así coma no espectáculo Menjam, da compañía catalana “Trasgosnanoite”. En 2002 empeza a traballar con distintas compañías de teatro profesional, como “Volta e Dalle”, “Os Quinquilláns” e “Nut teatro”, como técnico de escena, manipulador e actor.



Actor de teatro,cine e tv. Traballou en varias compañías de teatro, entre elas Teatro do Aquí, nos espectáculos A Ópera do Patacón, Rastros e Camiño Longo, baixo a dirección de Roberto Vidal Bolaño. No Centro Dramático Galego no espectáculo Xelmirez ou a gloria de Compostela. Na compañía de teatro do Atlántico, no espectáculo Non se chora, baixo a dirección de Xulio Lago. En cine ten participado entre outras nas seguintes películas Heroína, A Promesa ou O Agasallo de Silvia. En teleseries traballou en Un mundo de Historias, As Leis de Celavella, Libro de Familia, e Terra de Miranda, na que era protagonista. Actor e director de dobraxe desde 1986 é a voz habitual entre moitas outras de Paul Newman, Harrison Ford, Robert de Niro ou a rá Gustavo.